我其實好早就係Dune迷。好多人話David Lynch1984年拍果套《Dune》係爛片，但細細個起經已係超鍾意（大個之後就因為佢夠Cult）。之後《Dune》出嘅頭兩集電腦Game（第三集3D版因為電腦唔夠勁玩唔倒），Remaster版《Dune2000》、2000年果套爛劇、六本沙丘魔堡小說我全部睇哂
所以無乜人會比我更加期待新版《Dune》嘅上映，仲要今日上畫就即刻去咗睇IMAX。然而睇完之後卻係失望。
首先我最唔滿意嘅，就係搞埋啲故弄玄虛嘅鏡頭，懶係暗示主角有預知能力，但變相就嚴重拖慢左套戲嘅節奏，搞到成套戲都窒下窒下咁，搞成兩個鐘都只係去到舊版嘅一半劇情。
其次就係雖然花咗好多內容去做人物描寫，但老實講除咗個老母，真係無乜邊個有令我留低深刻印象：主角老豆同果幾個將領其實都係面目模糊，至於男主角Timothée Hal Chalame當日拍《The King》果陣，我已好唔滿意佢成撚日Chok住個樣黎做戲；估唔到去到《Dune》個演繹模式都係一撚樣，大概就係早期謝檸檬做戲果種感覺，一味覺得Chok到好撚型，但個角色就似Model多啲，無乜血肉可言囉。
第三則係佢嘅科幻特技：即係所有飛船同建築都係Brutalism風格設計，唔係話唔得，但卻係令到當有戰鬥場面時感覺就好似一舊舊磚郁黎郁去，無乜震撼力。雖然原著都有講到好多戰鬥都係匕首戰，但你搞到兩班軍隊用劈友黎分勝負就係拍得唔型囉……
簡單黎講，當日我鍾意Dune，係因為佢係一個充滿住宮廷陰謀、生死逃亡、矢意復仇嘅歷險故事，但最終呢個導演卻扮到充滿住意識流片段、懶有哲學性、同埋堅持拖慢節奏樣樣嘢攤哂出黎嘅介紹式前傳。再加埋啲角色（除咗老母幾正）、特技都唔討好，響我心目中，就只係一套ok的科幻片咁囉
Search